Орусиянын Коргоо министрлиги 15-июлга караган түнү өздөрүнүн беш аймагынын жана Кара деңиздин үстүнөн Украинанын кеминде 55 дрону атып түшүрүлгөнүн, бир канча адам жараат алганын билдирди.
Воронеж облусунун губернатору Александр Гусев соңку соккуда бери дегенде 16 киши, анын ичинде бир өспүрүм жараат алганын, бир аял ооруканага жеткирилгенин кабарлады. Анын сөзүнө караганда, көп кабаттуу үйдөгү бир нече батир, шаардын четиндеги жер тамдар дагы жабыркады.
Украина шейшембиге караган түнү орус армиясы бир канча аймагын дагы аткылаганын билдирди. Ага ылайык, Сумы облусунда психдиспансердин корпусу жана 10дон ашык көп кабаттуу үй жабыркады, бир адам жараат алды. Донецк облусундагы чабуулда төрт тургун жараат алып, ооруканага жеткирилди.
Согуш маалында бул маалыматтарды бейтарап булактардан бышыктоо мүмкүн эмес.
Украинанын президенти Владимир Зеленский дүйшөмбүдө АКШ президентинин атайын чабарманы Кит Келлог менен жолугуп, "жемиштүү" сүйлөшүү өткөнүн белгиледи.
"Тынчтыкка жетүүнүн жолдорун талкууладык, аны жакындатуу үчүн баары колубуздан келет. Бул - Украинанын абадан коргонуу системасын күчтөндүрүү, Европа менен курал-жабдыктарды чогуу өндүрүү жана сатып алуу. Албетте, Орусияга каршы санкциялар да бул багытта көмөкчү болот", - деп украин лидери жазды. Келлог Киевде бир апта жүрөрү кабарланды.
14-июлда эртең менен Келлогду Киевдеги темир жол вокзалынан украин президентинин кеңсе башчысы Андрей Ермак тосуп алды.
"Коргонуу, коопсуздукту бекемдөө, курал-жарак, санкциялар, элибизди коргоо, Украина менен АКШ ортосунда кызматташтыкты чыңдоо - талкууга тема көп", - деп Ермак телеграм-каналына жазды.
Ермак ошондой эле "Орусия ок атууну токтотууга ниети жоктугун" белгилеп, "күч менен тынчтыкка жетүү - АКШ президенти Дональд Трамптын принциби, биз андай ыкманы колдойбуз" деп жазды.
Кит Келлог өткөн аптада Римде Украинаны калыбына келтирүү боюнча конференцияга катышып, кийинки жумада Киевде барарын жарыялаган.
Украинанын президенти Владимир Зеленский 9-июлда Римде Келлог менен жолуккан соң Киевге америкалык курал-жаракты жиберүү жана Орусияга каршы санкциялар тууралуу сөз болгонун билдирген.
Келлогдун бул сапары Трамп бийликке келгенден бери Украинага аскердик жардам пакетин бекитчү маалга туш келди. Ушуга чейин Киев президент Жо Байдендин администрациясы бекиткен жардамды алып келди. Presidential Drawdown Authority программасы Кошмо Штаттардын президентине Конгресстин макулдугусуз эле чечим кабыл алууга укук берет.
Украинада орус күчтөрүнүн түнкү аба соккусунан Сумы облусунда 50 жана 55 жаштагы жергиликтүү тургундар каза тапканын аймактын администрация башчысы Олег Григоров дүйшөмбү билдирди. Анын маалыматына караганда, Шостка шаарында жарандык инфраструктура жайы жана 30 чакты имарат зыянга учурады.
Орусиялык аскерлер бул маалыматты комментарийлеген жок. Москва күн сайын кошуна өлкөнүн тынч шаар-кыштактарын аткылаганы менен аскердик объектилерди гана бутага алганын билдирип келет.
14-июлда АКШ президенти Дональд Трамп НАТОнун баш катчысы Марк Рютте менен Ак үйдө жолукканда Орусия 50 күндүн ичинде Украинадагы урушту токтотуу үчүн макулдашууга көнбөсө Москва жана анын соода өнөктөштөрү "өтө катаал" бажы тарифтерине кабыларын эскертти.
Трамп тарфитер 100% чейин көтөрлүшү ыктымал экенин белгиледи. АКШ Сенатында ушул тапта Орусиянын энергетикалык ресурстарын сатып алган соода өнөктөштөрүнө төлөмдөрдү 500% чейин көтөрүү тууралуу мыйзам долбоору талкууланып жатат.
Америкалык лидер Москва менен макулдашууга жетишебиз деп турганын, согушту токтотуу үчүн соода "жакшы курал" болуп берерин белгиледи.
Трамп Вашингтон жана анын өнөктөштөрү НАТОго кирген Европа өлкөлөрүнүн эсебинен Украинага курал-жабдык жиберүүнү макулдашканын айтты. Курал-жабдыкты жеткирүүнү НАТО координациялайт. "Биз курал-жарак чыгарабыз, ал үчүн биз эмес, алар төлөшөт" деп Трамп Евробиримдиктин өлкөлөрүн көрсөттү.
Трамп ошондой эле Киевге абадан коргонуучу "Пэтриот" системаларынан 17ге чейин берилерин, алар "тез арада" майданга жеткирилерин айтты. Ачык маалыматка караганда ушул тапта Украинада мындай жети система бар.
Рютте абадан коргонуу системаларынан башка дагы курал-жабдыктын түрүн жеткирүү тууралуу сөз болгонуна токтолду. Маалымат каражаттары Киевге алыска уча турган ракеталарды берүү жагы караларын жазган.
Трамп Орусиянын Украинада урушту токтотпой жатканына нааразы экенин белгилеп, Вашингтон тынчтык келишимине жакындап калдык деп санаганы менен реалдуулук андай болбой калганын дагы кайталады.
Москва ок атышууну токтотуп, тынчтыкка жетүү үчүн өз шарттарын коюп, анын ичинде Украинанын төрт облусунан украин армиясынын чыгып кетишин талап кылган. Киев Кремлдин шарттарын кескин четке каккан.
Трамптын соңку билдирүүсүнөн кийин Москва комментарий бере элек.
АКШнын президенти Дональд Трамп жекшемби күнү Украинага Patriot системасын жөнөтүү тууралуу дагы убада берди жана анын акысын европалык өлкөлөр төлөрүн кайталады.
Ал журналисттердин суроолоруна жооп берип жатып "биз аларга абадай керек болуп жаткан "Патриотторду" жөнөтөбүз, анткени Путин көбүн таң калтырды. Ал сыпаа сүйлөп туруп, кечинде эле бомбалап жатат. Бирок бул жерде кенедей маселе бар: бул мага жакпай жатат", - деди.
Мунун алдында, бейшембиде Трамп Украинага Patriot комплекстерин жөнөтөрүн, анын чыгымын НАТО төлөрүн билдирген. Кошмо Штаттарынын президенти дүйшөмбүдө, 14-июлда Орусия тууралуу маанилүү билдирүү жасарын жарыялаган.
Вашингтон Киевге мындай канча комплекс жөнөтөрүп тактаган жок.
Украинанын президенти Владимир Зеленский мунун алданда Кошмо Штаттарынан жана Европа Биримдигинен курал алууда “оң жылыш” бар экенин айткан.
Ушул айдын башында Вашингтон Киевге курал-жарактын айрым түрлөрүн берүүнү токтоткону белгилүү болгон.
Мындай чечим Коргоо министрлиги АКШнын башка өлкөлөргө көрсөтүп жаткан аскердик жардамын карап чыккандан кийин, Американын улуттук кызыкчылыктары биринчи орунга коюлганы менен байланыштырылган.